– Det viktigaste USA-valet på ein generasjon

–  Det amerikanske valet i 2024 er utan tvil det viktigaste for europeisk tryggleik på ein generasjon, seier forskar 1 Karsten Friis ved Norsk utanrikspolitisk institutt (NUPI).

Han er ein av forfattarane bak NUPI-rapporten US and UK Elections: Implications for NATO and Northern European Security, som vart publisert denne veka. Medforfattarar er Ed Arnold (Seniorforskar, RUSI) og Max Bergman (Direktør for Program for Europa, Asia og Eurasia, CSIS).

– USA sitt fokus på Asia-Stillehavet er veksande, og dei militære og politiske ressursane avgrensa. Europa må nok belage seg på å ta ein endå større del av den tryggingspolitiske byrda i åra framover, samanfattar Friis.

Viktige poeng i rapporten:

• Det amerikanske presidentvalet vil få store konsekvensar for framtida til NATO og europeisk tryggleik, med potensial for store forskjellar avhengig av resultatet.
• Harris vil sannsynlegvis tilby meir kontinuitet med politikken til den noverande Biden-administrasjonen overfor NATO og Ukraina. Europeiske allierte bør likevel vere førebudde på at USA kan komme til å flytte meir ressursar og merksemd til Asia-Stillehavsregionen, gitt Kinas ambisjonar og innverknad.
• Ein andre periode med Trump vil gi større uvisse og potensielt eit dramatisk skifte i USAs NATO-politikk. Trumps langvarige skepsis til alliansen, og dessutan innverknad frå rådgivarar som deler dette synet, kan føre til at USAs rolle i europeisk tryggleik blir monaleg svekt.
• Harris har forsikra Europa om sin og USAs forpliktingar overfor europeisk tryggleik. Derfor vil europeiske statar ha få incentiv til å ta dei nødvendige grepa som trengst for å tilpasse seg ein stadig meir usikker tryggingssituasjon.
• Med Trump i presidentstolen kan europearar oppleve at tryggingsalliansen med USA blir kasta ut i kaos, og dermed bli tvinga til å vurdere vanskelege og ubehagelege steg for å styrkje sin eigen tryggleik.
• Storbritannias nye Labour-regjering, under statsminister Keir Starmer, har uttrykt ei tilnærming som set "NATO først" og ønskjer å "tilbakestille" forholdet til Europa. Dei gjennomfører ein strategisk forsvarsgjennomgang for å vurdere framtidige tryggingsbehov i lys av det skiftande geopolitiske landskapet. I dette er det amerikanske valresultatet ein avgjerande faktor.
• Noreg og andre nordiske land må førebu seg på mindre amerikansk militært nærvær i Europa uavhengig av kven som vinn valet. Dette gjer det nødvendig med meir europeisk ansvar for forsvar og tettare samarbeid mellom allierte, inkludert auka forsvarsbudsjett og integrering av militære styrkar.