IP rangert øvst blant norskspråklege vitskaplege tidsskrift

Tidlegare i vår varsla regjeringa at ho ønskjer å styrkje norsk som fagspråk, mellom anna gjennom å auke delen vitskaplege artiklar på norsk. No får eit rekordhøgt tal tidsskrift støtte gjennom Støtteordning for opne norskspråklege tidsskrift for perioden 2027–2030. NUPI-tidsskriftet Internasjonal Politikk (IP) er rangert øvst med ei tildeling på 464 300 kroner.

Les meir om støtteordninga og tildelinga her.

– Redaksjonen av tidsskriftet Internasjonal Politikk er glade og stolte over å bli innstilt øvst blant norskspråklege vitskaplege tidsskrift etter søknadshandsaminga. Det er ei anerkjenning av at den demokratiske offentlegheita behøver eit skandinaviskspråkleg tidsskrift som studerer nettopp internasjonal politikk, seier IP-redaktør og seniorforskar ved NUPI, Kristin Fjæstad.

Betre vilkår for publisering på norsk

I framlegget frå regjeringa til statsbudsjett for 2027 blir det føreslått å auke løyvinga til den nasjonale støtteordninga for opne norskspråklege forskingstidsskrift med 3,5 millionar kroner, slik at den samla årlege ramma blir 15,5 millionar kroner. IP har fått støtte over ordninga i fleire år, og redaktørane opplever at vilkåra for publisering på norsk har blitt markant betre dei siste åra.

– Vi er også glade for at statsbudsjettforslaget styrkjer finansieringa av støtteordninga. Dette kan bli ein viktig siger for norsk som fagspråk, legg Fjæstad til.

Les internasjonal politikk gratis her. 

Ole Martin Stormoen, som også er del av redaktørteamet, peikar på at god og kvalitetssikra informasjon på norsk i aukande grad blir sett i samanheng med samfunnsberedskap.

– I desse tider kan det kjennast som den geopolitiske grunnen beveger seg under føtene våre nærast frå veke til veke. Då er det maktpåliggjande å leggje til rette for faglege flater som publiserer sakte tenking og analyse som er ope tilgjengeleg på eit akademisk språk som nordmenn forstår. Slik kunnskap er essensiell beredskap i ei uroleg verd, seier han.

• Les meir: Nytt redaktør-team i Internasjonal Politikk

Forskingssjef ved NUPI Kristin Haugevik meiner dette er ei positiv utvikling når verda er prega av aukande internasjonal uro og omfattande innhaldsproduksjon frå useriøse aktørar og plattformer.

– Då er kvalitetssikra kunnskap på godt norsk viktigare enn nokon gong. IP er eitt av NUPIs flaggskip. Denne løyvinga bidreg til at tidsskriftet framleis kan vere ein sentral arena for fagutveksling på norsk, seier Haugevik.

Sprek 90-åring

Internasjonal Politikk kjem ut i fire utgåver i året. Artiklar og fokusspalter blir publiserte løpande på nettsida til tidsskriftet. Talet på lesarar aukar. Tidsskriftet, som vart starta av Norsk komité for internasjonale spørsmål i 1937, har sidan 1960 vore eigd av NUPI. Dei siste åra har Cappelen Damm Akademisk vore utgjevar.

– Den noverande redaksjonen står på skuldrene til kjempar. Vi vil særleg takke tidlegare redaksjonar for grunnlaget dei har lagt samt Cappelen Damm Akademisk for godt og tett samarbeid, rosar seniorforskar og redaktør Thor Olav Iversen og legg til:

– Til slutt vil vi nemne at Internasjonal Politikk fyller heile 90 år neste år. Vener og lesarar av tidsskriftet kan vente seg eit jubileumsnummer som tek føre seg Noreg og Norden sin plass i verda, samt sleppfest for å feire den spreke nittiåringen, freistar Iversen.